կարևոր
2254 դիտում, 11 ամիս առաջ - 2021-07-06 12:59

Խորհրդարան մտնելու որոշումը կայացվելու է համատեղ, վերջնական որոշումը «Հայաստան» դաշինքը կհայտնի ՍԴ-ի եզրակացությունից հետո. Իշխան Սաղաթելյան

Խորհրդարան մտնելու որոշումը կայացվելու է համատեղ, վերջնական որոշումը «Հայաստան» դաշինքը կհայտնի ՍԴ-ի եզրակացությունից հետո. Իշխան Սաղաթելյան

Ընտրություններից հետո շարունակվում են համատարած բռնաճնշումները բոլոր այն անձանց հանդեպ, ովքեր չենք քվեարկել այսօրվա իշխանության օգտին։ Այս մասին ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը ՀՅԴ Հայաստանի 24-րդ Գերագույն ժողովից հետո կազմակերպած մամուլի ասուլիսի ժամանակ։

«Մեծ ծավալով շարունակվում են ապօրինի ճնշումներն ընտրված համայնքների ղեկավարների նկատմամբ․ դրանով փորձ է արվում քանդել նաև ՏԻՄ ինստիտուտը և դա դարձնել նշանակովի, կան արդեն բազմաթիվ ակնհայտ ճնշումներ բոլոր այն համայնքների ղեկավարների նկատմամբ, որոնք մաս են կազմել «Հայաստան» դաշինքին կամ ունեցել են այլ դիրքորոշում, որը տարբերվել է գործող իշխանության դիրքորոշումից»,-ասաց նա։

Իշխան Սաղաթելյանը նշեց, որ ակնհայտ ճնշումներ են շարունակվում նաև հանրային ծառայողների նկատմամբ։

«Մենք այս բոլորը արձանագրում ենք, հավաքագրում ենք, տրամադրելու ենք նաև միջազգային կազմակերպություններին, և ձեռնարկելու ենք բոլոր անհրաժեշտ քայլերը մեր համակիրներին և աջակիցների իրավունքների պաշտպանությունը կազմակերպելու համար»,-ասաց Իշխան Սաղաթելյանը։

Իշխան Սաղաթելյանը բացառում է տարբերակը, որ միայն ՀՅԴ-ն մտնի խորհրդարան, այս որոշումը կկայացնի «Հայաստան» դաշինքը:

«Որոշումն ընդունվելու է համատեղ: Այդ որոշումը բխելու է մեր պայքարի հաջողության տրամաբանությունից: Եթե գանք եզրակազության, որ այդ մանդատները վերցնելով մեր պայքարին նոր ուժ ենք տալու, ուրեմն կգնանք այդ տարբերակով, կվերրցնենք մանդատները ու մեր պայքարը կշարունակենք», - նշեց Սաղաթելյանը:

Հարցին՝ քննարկվե՞լ է խորհրդարան չգնալու տարբերակը՝ ԳՄ ներկայացուցիչը պատասխանեց, որ հատկապես սկզբնական օրերին նման քննարկումներ եղել են.

«Հիմա հակված ենք մյուս տարբերակին, բայց վերջնական որոշումը կհայտնենք ՍԴ-ի եզրակացությունից հետո»:

Անկախ խորհրդարանում լինելու հանգամանքից, Սաղաթլյանի խոսքով, փողոցն իրենց համար կարևոր է: Նրա հավաստմամբ, այս ընդդիմությունը տարբերվելու է մինչ այս եղած բոլոր ընդդիմություններից:

«Խորհրդարանում այս իշխանությանն օր ու արև չենք տալու»,-նշեց Սաղաթելյանը:

Իսկ այս փուլում, եզրահանգել են, փողոցային պայքարն արդյունավետ չէր լինի, այդ իսկ պատճառով գնացին ՍԴ դիմելու ճանապարհով: