Փորձ է արվել պայթեցնել ոչ միայն Երեւանի "Հարսնաքարը", այլեւ Սեւանի՞նը վիդեո

11:44 . 02/07

Հուլիսի 1-ին, գիշերը ժամը 2.15-ի սահմաններում, զինվորական հագուստով մի քաղաքացի ճամպրուկով մտել է Երեւանի "Հարսնաքար" ռեստորանի տարածք եւ սպառնացել, որ այն պայթեցնելու է:

 

Ռեստորանային համալիր են ժամանել Ոստիկանության Նոր Նորքի բաժնի եւ Ոստիկանության Ավանի բաժանմունքի աշխատակիցները: Օպերատիվ-քննչական խումբը շուրջ երեք ժամ բանակցություններ է վարել քաղաքացու հետ, ինչի արդյունքում նրան կարողացել են վնասազերծել:

 

 

 

Քաղաքացու պայուսակում հայտնաբերվել է երեք 400 գրամանոց, երկու 200 գրամամոց, մեկ 25 գրամանոց տրոտիլ, 2 նռնակ, 40 9 մմ տրամաչափի փամփուշտ, կրակատար քուղ՝ 8 պայթուցիչներով, արձակման համակարգ, 1 լուսային ազդանշանային հրթիռ, ծալովի 2 դանակ եւ բջջային հեռախոս: Այդ ամենն առգրավվել է:

Ավելի ուշ պարզվել է, որ "Հարսնաքար" ռեստորանային համալիրը պայթեցնել փորձած քաղաքացին ՀՀ Զինված ուժերի փոխգնդապետ, Երևանի մայրաքաղաքային գնդի հրամանատարի տեղակալ, 39-ամյա Վարդան Սամվելյանն է:

Հայաստանի Պաշտպանության նախարարությունից Panorama.am-ին տեղեկացրել են, որ Սամվելյանը ձերբակալվել է։ Չորրորդ կայազորային քննչական բաժնում նախապատրաստված նյութերի հիման վրա հարուցվել է քրեական գործ ՀՀ Քր. Օր. 235-րդ հոդվածի 1-ին մասի հատկանիշներով՝ "Ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը"։

Փոխգնդապետը հարցաքննվել է որպես կասկածյալ, ձերբակալվել և տեղափոխվել է ՀՀ ՊՆ Ռազմական ոստիկանության կայազորային կարգապահական մեկուսարան։ 

Քրեական գործի նախաքննությունը շարունակվում է։

Ի դեպ, ըստ որոշ լրատվամիջոցների, նույն օրը՝ գրեթե նույն ժամին, երեք զինվորական էլ փորձել են մուտք գործել Սեւանի "Հարսնաքար" հյուրանոցային համալիր, սակայն այստեղ պահակախումբը կարողացրել է հեռացնել նրանց։

Հիշեցնենք, որ հունիսի 17-ին ԱԺ պատգամավոր, ՀՖՖ նախագահ Ռուբեն Հայրապետյանին պատկանող "Հարսնաքար" ռեստորանային համալիրում անվտանգության աշխատակիցները ծեծի էին ենթարկել զինվորական հոսպիտալի նեյրովիրաբուժության բաժանմունքի միկրովիրաբույժ Արտակ Բայադյանին, կլինիկական օրդինատոր, ավագ լեյտենանտ Գարիկ Սողոմոնյանին եւ Կենտրոնական կլինիկական զինվորական հոսպիտալի բաժանմունքի ղեկավար, մայոր Վահե Ավետյանին, ով ուժեղ հարվածներից ստացել էր ուղեղի այտուց, իսկ մի կիսագունդը թեքվել է դեպի մյուսը: Վահե Ավետյանի կյանքը այդպես էլ փրկել չէր հաջողվել:

Հունիսի 30-ի երեկոյան նշված ռեստորանի մոտ տեղի ունեցավ մոմավառություն, որին մասնակցեցին հարյուրավոր քաղաքացիներ: