Բաքվում ձերբակալել են թալիշների թերթի հերթական խմբագրին վիդեո

10:59 . 22/06

Ադրբեջանում թալիշերենով լույս տեսնող "Թոլըշի Սադո" (Թալիշի ձայն) թերթի եւ համանուն կայքի գլխավոր խմբագիր, իրավապաշտպան Գիլալ Մամեդովը երեկ Բաքվում առեւանգվել է անհայտ մարդկանց կողմից:

Այդ մասին հայտարարել է Ադրբեջանի խաղաղության եւ ժողովրդավարության ինստիտուտը: Միայն ժամը 17:30-ին Բաքվի ոստիկանությունում հաստատել են, որ Գիլալ Մամեդովը ձերբակալվել է թմրանյութ պահելու մեղադրանքով:

"Խաղաղության եւ ժողովրդավարության ինստիտուտը" փաստը գնահատում է որպես քաղաքացիական ակտիվիստի նկատմամբ ճնշում եւ իշխանություններից պահանջում է անհապաղ ազատ արձակել Գիլալ Մամեդովին:

"Թոլըշի Սադո" թերթի նախկին գլխավոր խմբագիր, Թալիշական մշակութային կենտրոնի պրոֆեսոր Նովրուզալի Մամեդովը 2007 թ-ին Ադրբեջանում ձերբակալվել է "թալիշական լեզու եւ արժեքներ քարոզելու" համար: Հետո նա 10 տարի ժամկետով ազատազրկման է ենթարկվել` Իրանի օգտին լրտեսություն կատարելու մեղադրանքով: 2009 թ-ին երկարատեւ բարոյահոգեբանական ճնշումներից հետո, 68-ամյա թալիշ պրոֆեսորը բանտախցում մահացել է "ուղեղի անոթների սուր խցանման" պատճառով:

Ի՞նչ ճակատագիր են նախատեսել Ադրբեջանի իշխանությունները հաջորդ թալիշ խմբագրի համար, մնում է անհայտ։ Վերջին տարիներին թալիշական ազատագրական շարժումը մեծ թափ է ստացել։ Վերջերս նաեւ համացանցում հայտնվել է թալիշական ազգային օրհներգի տեսահոլովակը։