17:50 . 21/06
Տոլմայի համահայկական փառատոնն արդեն երկրորդ տարին անընդմեջ կանցկացվի հուլիսի 11-ին Սարդարապատում: Փառատոնի այս տարվա գերնպատակը կլինի նույնը` հայկական տոլմայի պատմության վերականգնումը եւ նոր տարատեսակների ի հայտ բերումը: "Արմենպրես"-ի հաղորդմամբ`այսօր լրագրողների հետ հանդիպման ժամանակ այդ մասին նշեց "Հայ խոհարարական ավանդույթների զարգացման եւ պահպանման" հասարակական կազմակերպության նախագահ Սեդրակ Մամուլյանը:
Նրա խոսքով` փառատոնը հնարավորություն կտա մարդկանց հիշեցնել, որ ավանդական կերակրատեսակներով է անհրաժեշտ սնվել, որի արդյունքում կունենան լավ տրամադրություն եւ առողջություն: Փառատոնը կանցկացվի "Ոսկե ծիրան" երեւանյան միջազգային կինոփառատոնի շրջանակներում:
Կինոփառատոնի միջոցառումների կազմակերպիչ Վարդան Հակոբյանը նշեց, որ խոհանոցի ու կինոյի մեջ մեծ կապ կա: "Յուրաքանչյուր մարդ, այցելելով նոր երկիր, բացի պատմամշակութային կոթողներ տեսնելուց, շատ արագ ծանոթանում է նաեւ այդ երկրի խոհանոցին: Այդ իսկ պատճառով մենք հետաքրքիր ենք համարում այս համագործակցությունը",- ասաց նա:
"Հայ խոհարարական ավանդույթների զարգացման եւ պահպանման" ՀԿ քարտուղար Վահե Անթանեսյանը նշեց, որ փառատոնին այս տարի կներկայացվի շուրջ երեսուն տաղավար` վաթսուն տարատեսակ տոլմաներով: "Մենք պնդում ենք, որ տոլման ամենահայկական կերակրատեսակն է",- ասաց նա: