Բերեզովսկուն երկրպագուներն ընդունեցին որպես հերոսի

16:27 . 02/06

Հայաստանի ազգային հավաքականը՝ Վարդան Մինասյանի գլխավորությամբ, ժամանել է Երեւան: Երկրպագուների հայկական առաջին ճակատը մեծ ոգեւորությամբ դիմավորել է Հայաստանի ազգային հավաքականի ֆուտբոլիստներին:

Եթե Իռլանդիայի հավաքականի հետ հանդիպումից հետո բոլորը ոգեւորող խոսքեր էին ասում մեր դարպասապահ Ռոման Բերեզովսկուն, ապա այսօր նրան դիմավորել են որպես հերոսի: Այսօր երեկոյան մեր թիմը Ղազախստանի հավաքականի հետ հանդիպումից առաջ բաց մարզում կանցկացնի:

Հունաստանի հետ հանդիպումը չնայած ավարտվեց 0:1 հաշվով՝ հօգուտ հույների, սակայն շատ երկրպագուների կարծիքով, այն ավարտվեց 2:1 հաշվով՝ հօգուտ մեր հավաքականի դարպասապահ Ռոման Բերեզովսկու, ով ձեռնունայն թողեց բոլոր հույներին` որսալով միանգամից 11 մետրանոց երկու հարվածները: Չնայած մեր ընտրանին պայքարեց մինջեւ վերջ, փորձելով փրկել խաղը, սակայն 23-րդ րոպեին ընդունած գնդակը ցույց տվեց, որ մեր կենտրոնական պաշտպաններն ունեն խաղային փորձի պակաս եւ թույլ տվեցին դիրքային մի շարք սխալներ: Եթե հաշվի առնենք այն փաստը, որ Ռոբերտ Արզումանյանը վերջին մի քանի ամիսների ընթացքում չի կարողանում մշտապես խաղադաշտ դուրս գալ "Յագելոնիայի" հիմնական կազմում, իսկ Հրայր Մկոյանն էլ վերջին շրջանում չի կարողացել ամրապնդվել Նալչիկի "Սպարտակի" կազմում, ապա պարզ է դառնում, որ ներկա պահին պաշտպանությունը հավաքականի թույլ կետերից մեկն է:

Հարձակման գիծն էլ իրեն չարդարացրեց: Յուրա Մովսիսյանը խաղից հետո նշել է, որ 10-օրյա հանգստից հետո խաղադաշտին հարմարվելու համար պահանջվեց մեկ խաղակես: Հենրիխ Մխիթարյանն ու Մարկոս Պիզելին էլ կարծես կորցրել էին նշանառությունը եւ երկուսի հարվածներն էլ շեղ էին ստացվում:

Միգուցե մրցավարական սխալների պատճառով էր, որ Հունաստանի հավաքականի հետ խաղի ժամանակ տեղի տվցին նաեւ Վարդան Մինասյանի նյարդերը, ով վիճելով մրցավարի հետ, ստիպված լքեց պահեստայինների նստարանը: Վարդան Մինասյանը այս հանդիպման մասին իր կարծիքը կհայտնի Երեւանում:

Հունիսի 5-ին Վազգեն Սարգսյանի անվան հանրապետական մարզադաշտում մեր ընտրանին կհյուրընկալի Ղազախստանի հավաքականին, որը 5:2 հաշվով առավելության է հասել Ղրղստանի հավաքականի նկատմամբ: