Վահան Հովհաննիսյան. "Երկրի համար այս խորհրդարանը, չեմ կարծում՝ կարողանա օգտակար լինել"

19:33 . 31/05

5-րդ գումարման Ազգային ժողովը, դաշնակցական պատգամավոր Վահան Հովհաննիսյանի կարծիքով, ճահիճ է լինելու: Արդեն այսօր, ԱԺ լիագումար նիստի աշխատանքային մթնոլորտից Վահան Հովհաննիսյանը նման տպավորություն է ստացել:

Tert.am–ի հետ զրույցում նա նշել է. "Բայց կցանկանայի, որ այդպես չլիներ, եթե կոմֆորտ է իրեն զգում մեծամասնությունն էս վիճակում, նրանց գործն է, բայց երկրի համար այս խորհրդարանը, չեմ կարծում, որ կարողանա օգտակար լինել":

Ի պատասխան հարցի, թե նաև ԱԺ հանձնաժողովներում առաջադրված չլինելու և այլ գործոններով պայմանավորված` ՀՅԴ-ն է՞լ ավելի ընդդիմադիր խմբակցություն է դառնալու, քան 4-րդ գումարման ԱԺ-ում էր, Վահան Հովհաննիսյանն ասել է. "Մենք ընդդիմադիր կուսակցություն ենք, ընդդիմադրի ծայրահեղականը կամ մեղմ, լպրծունը ես չեմ հասկանում։ Ընդդիմությունն ընդդիմություն է":

Վահան Հովհաննիսյանը նաև հավելեց, որ նախորդ խորհրդարանի ՀՅԴ խմբակցության գործունեությունը հստակ օրինակն է նրա, "թե ինչպիսին պետք է լինի ընդդիմությունը. սևին պետք է ասի՝ սև, սպիտակին՝ սպիտակ, և դա էլ մենք անելու ենք":

Հայտնի է, որ խորհրդարանում ներկայացված ուժերից առնվազն երեքը՝ ՀՅԴ-ն, "Հայ ազգային կոնգրեսը" և "Ժառանգությունն" ընդդիմադիր են: Եվ ,հետևաբար, հարց է առաջանում, ո՞րի հետ է համատեղ գործելու ՀՅԴ-ն՝ տարբեր օրենսդրական նախաձեռնություններ պաշտպանելիս կամ դրանց ընդդիմախոսելիս և վերջապես՝ Կառավարության գործունեության հետ կապված: Վահան Հովհաննիսյանն ասաց, որ խորհրդարան է, և այս կամ այն հարցի հետ կապված՝ դաշնակիցներ կարող ես գտնել կամ չգտնել, բայց դա չի կարող բերել "ալիանսի":