Փաստաթղթերի գողության համար ձերբակալվել է Հռոմի պապի անձնական սպասավորը

17:41 . 26/05

Վատիկանի ոստիկանությունը ձերբակալել է Հռոմի պապ Բենեդիկտոս 16-րդի անձնական սպասավորին, ով մեղադրվում էր գաղտնի փաստաթղթեր գողանալու մեջ. BBC-ին հղումով՝ գրում է tert.am-ը: 

Ձերբակալվածը Պապի անձնական սպասավոր Պաուլո Գաբրիելն է, ով մեկն է այն փոքրաթիվ մարդկանցից, ովքեր նրա աշխատասենյակ մտնելու իրավունք են ունեցել: 

Հենց նրա միջոցով էին լրագրողների ձեռքում հայտնվել փաստաթղթեր, որոնցում խոսվում էր կոռուպցիայի, ինչպես նաև Վատիկանում իշխանության համար մղվող պայքարի մասին:  

Հարցի հետաքննությամբ զբաղվելու համար մարտից, Հռոմի Պապի որոշմամբ, ստեղծվել էր հանձնաժողով, որի կազմում էին մի քանի կարդինալներ:  

Պաշտոնական հայտարարություն Պաուլո Գաբրիելի ձերբակալության մասին դեռ չի եղել, սակայն միջազգային լրատվամիջոցները որոշ մանրամասներ ներկայացնում են: 

Գաբրիելը ծառայում է Հռոմի պապին արդեն ավելի քան 6 տարի և փաստացի հանդիսանում է Պապին ամենամոտ կանգնած դեմքերից մեկը:

Նա անբասիր հեղինակություն է ունեցել մինչև այն պահը, երբ նրա տնից հայտնաբերվեց Բենեդիկտոս 16-րդ անձնական նամակներից մեկը, որն ուղղված էր Վատիկանի բանկին: