Երկիր Մեդիա

Ի՞նչ է մեզ սպասվում ընտրություններից հետո

19:40 . 06/05

Ի՞նչ են անելու քաղաքական ուժերը մայիսի 6-ի խորհրդարանական ընտրություններից հետո. ամեն բան կախված է ընտրությունների ընթացքից ու արդյունքներից: Մինչդեռ օրենսդրությունը սահմանում է ժամկետներ, համաձայն որոնց պետք է ընթանան հետընտրական զարգացումներ. նորընտիր Ազգային ժողովի առաջին նստաշրջան, նոր Կառավարության կազմավորում, ծրագրի ներկայացում...

Այսօր, ժամը 20.00-ին, երբ ավարտվի ընտրական օրն, ու փակվեն բոլոր ընտրատեղամասերն, այդ պահից ոչ ուշ, քան 24 ժամ հետո, Կենտրոնական ընտրական հանձնաժողովը Հանրային հեռուստատեսության եւ ռադիոյի ուղիղ եթերում կներկայացնի ընտրությունների նախնական արդյունքները: Այսպես պահանջում է Ընտրական օրենսգրքի 75-րդ հոդվածը: Այս նույն հոդվածը սահմանում է նաեւ, որ քվեարկության օրվանից հետո 7-րդ օրը ԿԸՀ-ն ամփոփում է ընտրության արդյունքներն ու ընդունում որոշում՝ ընտրությունների արդյունքների վերաբերյալ:

Բայց որպեսզի նորընտիր Ազգային ժողովը կարողանա գումարել իր առաջին նստաշրջանը, համաձայն Սահմանադրության, պետք է ընտրված լինեն պատգամավորների 2/3-րդը: Դրանից հետո 3-րդ հինգշաբթի օրն էլ գումարվում է Ազգային ժողովի առաջին նստաշրջանը:

Հենց այստեղ էլ ավանդաբար ի հայտ են գալիս տարաձայնությունենրն առանցքային մեկ հարցի շուրջ` երբվանի՞ց սկսել երրորդ հինգշաբթիի հաշվարկը. ընտրությւոնների արդյուքնների նախանակա՞ն, թե՞ վերջնական ամփոփումից հետո:

2007 թվականի մայիսի 12-ի խորհրդարանական ընտրություններից հետո 4-րդ գումարման Ազգային ժողովն առաջին նստաշրջանն անցկացրել է հունիսի 7-ին: Այսինքն, Սահմանադրությամբ սահմանված 3-րդ հինգշաբթին այն ժամանակ հաշվել են ընտրությանը հաջորդող 7-րդ օրից սկսած: Այս անգամ 3-րդ հինգշաբթիի հաշվարկը իշխանությունները որոշել են սկսել հենց ընտրության օրվանից, այսինքն, 5-րդ գումարման Ազգային ժողովի առաջին նիստը, ըստ նախնական որոշման, գումարվելու է մայիսի 24-ին:

Այստեղ հիշենք, որ օրն ընտրական է, եւ կուսակցությունների համամասնական ցուցակներում ընդգրկված պատգամավորության որեւէ թեկնածուի անուն եթերով հնչեցնելու իրավունք չունենք, ուստի հավելենք, սա` ըստ մեր աղբյուրների:

Այն պահից, երբ նորընտիր Ազգային ժողովը գումարի իր առաջին նիստը, կավարտվի այսօր դեռես գործող Ազգային ժողովի լիազորությունների ժամկետը:

Հենց նոր խորհրդարանի առաջին նիստի օրն էլ Կառավարությունը հրաժարական է ներկայացնում հանրապետության նախագահին: Այս հրաժարականից հետո տասնօրյա ժամկետում նախագահը, խորհրդակցելով խորհրդարանական խմբակցությունների հետ ու հաշվի առնելով խորհրդարանում պատգամավորների տեղերի բաշխվածությունը, նշանակում է նոր վարչապետ, որը, դարձյալ Սահմանադրությունն է սահմանում՝ պետք է վայելի պատգամավորների մեծամասնության վստահությունը:

Վարչապետի նշանակումից հետո 20-օրյա ժամկետում էլ կազմավորվում է նոր Կառավարությունը: Կառավարության կառուցվածքը սահմանվում է օրենքով: Այդ օրենքը վերջին անգամ փոփոխվել է 2008 թվականին, երբ նախագահական ընտրություններից հետո կոալիցիայի անդամների թիվը մեկով ավելացավ, ու պարզվեց, որ պետք է ավելացնել նաեւ նախարարությունների քանակը` կոալիցիայի նորեկին նախարարական պորտֆելներով ապահովելու համար: Հայրենի կառավարության կազմում այսօր կա 18 նախարարություն:

Ըստ բաժինների

Ի՞նչ է մեզ սպասվում ընտրություններից հետո

Լրահոս - վերջին 20 նորությունները