Գնդապետ Սանդրուկյանին կաշառք փոխանցողը նրա նախկին տեղակալն էր

11:02 . 26/04

Ռուսաստանի Դաշնության Ներքին գործերի նախարարության տրանսպորտի հարցերով քննչական վարչության արդեն նախկին պետ Էդուարդ Սանդրուկյանին 900 հազար դոլար է փոխանցել նրա նախկին տեղակալ Վադիմ Մյասիշևը։ Այս մասին "Life News"-ին հղումով՝ հայտնում է tert.am-ը։ 

 

Հիշեցնենք, որ Էդուարդ Սանդրուկյանը ձերբակալվել է 900 հազ դոլար կաշառք ստանալու համար: Նա այդքան գումարի դիմաց պետք է աջակցեր մի առևտրականի` սկսելու սեփական բիզնեսը: Քննիչների վարկածով` սա գումարի դեռ առաջին մասնաբաժինն էր:

 

"Life News"-ը` վկայակոչելով իր աղբյուրներին, հայտնում է, որ "չարաբաստիկ" գումարը Սանդրուկյանի տուն է բերել նրա նախկին տեղակալ, իսկ այժմ ՆԳՆ Տեղեկատվության վարչության աշխատակից, գնդապետ Վադիմ Մյասիշևը:  Ըստ նրա` Սանդրուկյանը վստահում էր իր նախկին տեղակալին: Միասին նրանք աշխատել են երկար տարիներ: Մյասիշևի այցից հետո, նրանք նշել են այդ իրադարձությունը:

 

Ձերբակալության հատուկ գործողությունը սկսվել է գումարի` հասցեատիրոջը հանձնվելուց 6 ժամ հետո միայն:

 

"Ձերբակալության օպերացիային մասնակցող Անվտանգության դաշնային ծառայության ու Քննչական կոմիտեի աշխատակիցները մինչև վերջին պահը չեն իմացել, թե միջնորդն ում է տանում գումարը",- "Life News"-ին հայտնել են տեղեկացված աղբյուրները` հավելելով, որ երբ պարզվել է, թե ում են ուղղված գումարները, ձերբակալությունն իրականացրել են ոչ միանգամից: Վեց ժամ է պահանջվել` ստանալու համար ձերբակալման համար բոլոր համաձայնությունները:

 

Սանդրուկյանն ու Մյասիշևը տարվել են "Բուտիրսկի" քննչական մեկուսարան: Սակայն Մյասիշեևը, իր նախկին պետի դեմ ցուցմունքներ տալուց հետո, ազատ է արձակվել: Այժմ նա գտնվում է տնային կալանքի տակ:

 

"Նրա գտնվելու վայրը խիստ գաղտնի է պահվում, քանի որ տեղեկություն է հայտնվել, որ նրան պատվիրել են քրեական հեղինակությունները, որոնց ֆինանսական շահերը, ամենայն հավանականությամբ, կապված են Էդուարդ Սանդրուկյանի ֆինանսական գործերի հետ",- հայտնել է աղբյուրը:

 

Մեշանսկի դատարանը քննչական բաժնի միջնորդության հիման վրա Էդուարդ Սանդրուկյանի ձերբակալության որոշում է կայացրել: Դատարանի որոշմամբ` ոստիկանության գնդապետը նախնական կալանքի տակ կմնա երկու ամիս, քանի դեռ քննչական գործողություններ են իրականացվում:

 

tert.am