Երկիր Մեդիա

Հանքարդյունաբերությունը զարգանալու լուրջ միտումներ ունի վիդեո

19:00 . 27/04

Հայաստանի ընդերքի օգտակար հանածոները ուսումնասիրվել են տասնամյակների ընթացքում, որի արդյունքում հայտնաբերվել են օգտակար հանածոների ավելի քան 480 հանքավայրեր: Ոլորտն ունի հիմնականում արտահանման ուղղվածություն:

"Վալլեքս" խմբի ընկերությունների վարչական շենքում ոլորտի խոշոր ընկերությունների ներկայացուցիչների հետ այսօր կայացած խորհրդակցության ժամանակ հանրապետության նախագահը հավաստիացրել է, որ ոլորտը զարգացնելու իշխանության նպատակները լուրջ են:

Հանքարդյունաբերական ոլորտի արտադրանքը արտահանվում է հիմնականում եվրոպական երկրներ: Համաշխարհային շուկայում գունավոր մետաղների գների աճի միտումը հնարավորություն տվեց նաեւ հայաստանյան ձեռնարկություններին ակտիվացնել արտադրական գործունեությունը: Ոլորտի 12 խոշոր ձեռնարկությունների ընդհանուր շրջանառությունը 2010-ին` 2009-ի համեմատ ավելացել է 85 մլրդ դրամով, իսկ նրանց կողմից պետբյուջե վճարված հարկերը գրեթե կրկնապատկվել են` 7.9 մլրդ-ից 2010-ին հասնելով 16.9 մլրդ դրամի:

Սակայն ոլորտում դեռեւս խնդիրներ կան.

Գագիկ Խաչատրյան, Պետական եկամուտների կոմիտեի նախագահ. "Մեզ համար կանխատեսելի լինի հարկային մուտքերը, իսկ բիզնեսի համար կանխատեսելի լինի հետագա զարգացումը տնտեսության մեջ օրենսդրության առումով":

Մոտակա երեք տարիների համար Անվտանգության խորհրդում վերջերս հաստատված մաքսային եւ հարկային բարեփոխումների ծրագիրը նախագահը կարեւորում է նաեւ հենց այս ոլորտի զարգացման համար: Առավելագույն պարզեցված համակարգի դեպքում, նախագահի խոսքով, հնարավոր կլինի հարկատուներին ազատել ավելորդ հոգսերից: Սակայն դա չի նշանակում հարկային դրույքաչափերի իջեցում: Գործարարները նախագահին վստահեցրել են, որ առաջիկա 3-3,5 տարիների ընթացքում կրկնապատկելու են իրենց գործունեության ծավալները:

Սերժ Սարգսյան, ՀՀ Նախագահ. "Կրկնապատիկ ավելի արտադրանք կստանան, իսկ սա նշանակում է կրկնապատիկ ավելի հարկեր, սա նշանակում է, եթե ոչ կրկնապատիկ, գոնե 0.7-0.8 անամ ավելի աշխատատեղ եւ, բնականաբար, նաեւ ուղեկցող այլ արտադրություններ":

Խորհրդակցության ժամանակ կարծիք է հնչել Հայաստանում պղնձաձուլարան կառուցելու մասին: Անհրաժեշտ շուրջ 60-80 հազար տոննա պղինձը դեռ Հայաստանը չունի:

"Վալլեքս" խմբի ընկերությունների նախագահ Վալերի Մեջլումյանը նկատում է, որ տարիներ առաջ հարկային եւ մաքսային ոլորտում առկա թերացումները խոչընդոտում էին հիմնականում արտադրանքի արտահանման գործընթացին: Այսօր իրավիճակը փոխվել է.

Վալերի Մեջլումյան, "Վալլեքս" խմբի ընկերությունների նախագահ. "Վերջին մեկ տարվա ընթացքում մենք զգում ենք տարբերությունը եւ դա նաեւ նախագահի քաղաքականության արդյունքն է":

Այս ոլորտը, որպես կանոն մշտապես բնապահանների ուշադրության եւ քննադատության թիրախում է: Վալերի Մեջլումյանը հավաստիացրեց, որ, մասնավորապես Թեղուտի անտառների դեպքում, որքան ծառ իրենք կտրում են, այնքան հաջորդ տարի արդեն շահագործվող տարածքներում վերականգնվում են անտառները: Մինչ խորհրդակցությունը, Հանրապետության ղեկավարին ներկայացվել են "Վալլեքս" խմբի ընկերությունների ներդրումային ծրագրերը, հանքարդյունաբերության, մետալուրգիայի, զբոսաշրջության եւ այլ ոլորտներում խմբի մեջ մտնող ընկերությունների գործունեության արդյունքները:

Ըստ բաժինների

Հանքարդյունաբերությունը զարգանալու լուրջ միտումներ ունի վիդեո

Լրահոս - վերջին 20 նորությունները