"Անսի" փառատոնում հայկական մուլտիպլիկացիան մեծ հետաքրքրություն է առաջացրել

20:46 . 18/06

Հայկական  պատվիրակությունը վերադարձել է ֆրանսիական Անսի քաղաքում հունիսի 4-9-ն անցկացվող միջազգային անիմացիոն  փառատոնից:  Հայաստանը մրցույթում ներկայանում էր  Ռոբերտ Սահակյանցի մուլտֆիլմերի ռետրոսպեկտիվ ցուցադրությամբ: 

"Փառատոնի մասնակցությունը հնարավորություն տվեց  այցելուներին  տեղեկանալ հայկական մուլտիպլիկացիայի գոյության մասին, որովհետեւ շատերը  հայկական արտադրանքը վերագրում էին խորհրդային արտադրության",- "Արմենպրեսի" թղթակցի հետ զրույցում  ասաց "Ռոբերտ Սահակյանց փրոդաքշն" մուլտիպլիկացիոն ստուդիայի նախագահ Դավիթ Սահակյանցը:

Նրա խոսքով`  փառատոնի շրջանակներում հայկական պատվիրակությունը պայմանավորվածություն է ձեռք բերել մասնակցելու Ամստերդամում, Բոլոնիայում, Մոսկվայում  եւ Զագրեբում կայանալիք  միջազգային փառատոնների:

"Մեծ հետաքրքրություն առաջացացրեց նաեւ "Անահիտը", ռուսական նման մեծ նախագծերի շուրջ ներգրաված է ոչ պակաս, քան  200 մարդ, իսկ "Անահիտը" ստեղծվում է ավելի փոքրաքանակ մասնագետների ներգրավմամբ",- պատմեց Սահակյանցը: Նա նշեց, որ առաջիկայում պարսկանան  խոշոր անիմացիոն ստուդիաներից մեկը  ամենայն հավանականությամբ կգնի  "Անահիտ" անիմացիոն լիամետրաժ  մուլտֆիլմի իրենց երկրում ցուցադրելու իրավունքը:

Մուլտիպլիկատորի տեղեկացմամբ, հնդկական մուլտարտադրող ընկերություներից մեկն էլ հետաքրքրված է "Դրակուլա" անիմացիան կարճամետրաժ ֆիլմով:  Հայկական պատվիրակությունը մասնակցել  է նաեւ փառատոնին զուգահեռ անցկացվող կինոշուկային, որտեղ հայկական տաղավարում ներկայացվելու են մուլտիպլիկացիայի ամենատարբեր նմուշներ, նաեւ` երիտասարդ մուլտիպլիակտորների աշխատանքներ: "Անսի" փառատոնի շրջանակներում Ռոբերտ Սահակյանցի  նախապես ներկայացրած 25 ֆիլմերից փառատոնի ժյուրին ընտրել է 9-ը, որոնց թվում են "Աղվեսագիրքը", "Կացինը" հանրահայտ մուլտֆիլմերը: 

"Հայաստանի համար  նման փառատոնի մասնակցելը արդեն իսկ մեծ նվաճում է",- ընդգծեց  Սահակյանցը` հավելելով, որ 2013-ին  Հայաստանը կմասնակցի  փառատոնին 1  կամ 2 կարճամետրաժ ֆիլմով: 

"Անսին" աշխարհի ամենահեղինակավոր փառատոններից մեկն է: Այն  առաջացել է, որպես Կաննի կինոփառատոնի մի մաս, այնուհետեւ` 1960-ից սկսել է գործել որպես առանձին կինոփառատոն: Փառատոնը ամեն տարի կազմակերպվում է հունիսի երկրորդ շաբաթվա ընթացքում. մասնակցում են շուրջ 6-7 հազար մասնագիտացած անիմատորներ եւ մոտ 400 լրագրողներ`  աշխարհի տարբեր անկյուններից:

"Անսիում" հաղթելն իրավունք է տալիս ներկայացնել ֆիլմը "Օսկար" մրցանակաբաշխությանը: Այս տարի փառատոնը ընդունում է 7000 մասնակից  80 երկրներից : Ցուցադրվելու են  500 ֆիլմ մրցութային և ոչ մրցութային ծրագրում: 2012 թվականին փառատոնի մրցութային ծրագրում  մասնակցել է 10 լիամետրաժ,   49 կարճամետրաժ ,  55 ավարտական,  60 հեռուստատեսային եւ  կոմերցիոն ֆիլմեր : Ոչ մրցութային ծրագիրը ընդգրկել է 10 լիամետրաժ,  40 կարճամետրաժ եւ 5 փակ դիտում պրեմիարայից առաջ: