Վարչապետ. "ՏՏ ոլորտի նախարարություն ստեղծելու հարցը կքննարկենք առաջիկայում"

18:25 . 15/06

Ինտերնետ սպառողների քանակով, ինտերնետի սակագնով, հասանելիությամբ, տարածվածությամբ և ենթակառուցվածքներով Հայաստանը տարածաշրջանում առաջին տեղում է: Այս մասին հունիսի 15-ին Երևանում բացված "ԴիջիԹեք" բիզնես ֆորումի ժամանակ հայտարարեց ՀՀ վարչապետ Տիգրան Սարգսյանը: Վարչապետը հիշեցրեց, որ հինգ տարի առաջ մեր երկիրն այդ բոլոր ցուցանիշներով զիջում էր իր հարևան պետություններին:

Վարչապետի խոսքերով, IT ոլորտի ներկայացուցիչները կառավարության առջև այժմ դնում են մեկ և կարևորագույն խնդիր՝ ապահովել կադրեր:

"Կադրերի այն թիվը, որն այսօր մեր բուհական համակարգը մատակարարում է, բավարար չէ: Պահանջարկը տարեկան 20-30 տոկոսով գերազանցում է այն հնարավորություններին, որոնք առկա են բուհական համակարգում: Մենք ոլորտի ներկայացուցիչներին հավաստիացրել ենք, որ կտրուկ կավելացնենք պետական պատվերը բուհերում, և ՏՏ ոլորտի համար կադրերի պատրաստումը կհամարենք առաջնահերթություն: Այսինքն, ֆինանսական միջոցների ներդրումն այս ուղղությամբ պետք է էապես ավելանաե,- նշեց վարչապետը: 

Իսկ նորագույն տեխնոլոգիաների ոլորտը կարգավորող նոր նախարարության ստեղծման հարցը դեռ պետք է քննարկվի ոլորտի մասնագետների հետ: 

"Նախարարության հարցը դեռ կքննարկենք առաջիկայում՝ մեր գործընկերների հետ: Կան և՛ կողմ, և՛ դեմ կարծիքներ: Ընդհանրապես, երևի թե մենք պետք է մտածենք ոչ թե բազմաթիվ նոր նախարարություններ բացելու մասին, այլ մեր նախարարությունների օպտիմիզացիայի մասին, և այդ տեսակետից մեր գործընկերների առաջարկը կքննարկենք՝ նայելով ապագային",- նշեց Տիգրան Սարգսյանը: 

Երկօրյա բիզնես ֆորումի նպատակն է աջակցել ինովացիոն տնտեսության ստեղծմանը և ներկայացնել ՏՀՏ բնագավառում բոլոր ապրանքներն ու ծառայությունները: Ֆորումին այս տարի գրանցվել է մասնակիցների 48 տոկոս աճ՝ ընդհանուր առմամբ 59 կազմակերպություն, այդ թվում` 21 արտասահմանյան։