Երեւանը պաշտոնապես հռչակվեց Գրքի համաշխարհային մայրաքաղաք վիդեո

15:32 . 23/04

 Երեւանը պաշտոնապես ճանաչվեց Գրքի համաշխարհային 2012 թ-ի մայրաքաղաք: Նախկին մայրաքաղաք Բուենոս Այրեսի քաղաքապետ Մաուրիցիո Մակրին տիտղոսը հանձնեց Երեւանի քաղաքապետ Տարոն Մարգարյանին: Միջոցառումն անցկացվեց խորհրդանշական Մատենդարանի բակում, որին ներկա էին ՀՀ նախագահ Սերժ Սարգսյանը, Ն.Ս.Օ.Տ.Տ. Գարեգին Բ Ամենայն Հայոց կաթողիկոսը, ՀՀ վարչապետ Տիգրան Սարգսյանը, Երեւան ժամանած հյուրերը, մշակութային-հասարակական գործիչներ:  

ինչպես տեղեկացնում է "Արմենպրեսը"՝ հոբելյանական հանձնաժողովի քարտուղար, ՀՀ նախագահ աշխատակազմի ղեկավար Վիգեն Սարգսյանը, ողջունելով հյուրերին, նշեց, որ երկուհազարութհարյուրամյա մեր քաղաքամայրը շատ վկայություններ է պահում համաշխարհային քաղաքակրթության  ամենատարբեր ժամանակաշրջաններից: "Այս տարի մենք ընդգծում եւ ի ցույց ենք դնում հատկապես այն էջերn, որոնք պատմում են գրքի եւ գրականության անցած ճանապարհի, ներկա հանգրվանի ու ապագայի մեր տեսլականի մասին:  Մատենադարանը մեր ամեն ինչն է ` լեզուն, գրականությունը, պատմությունը, ծննդյան վկայականն ու կենսագրությունը, մեր գալիք բոլոր հաղթանակների խարիսխը, մշտական եւ հարատեւ մեկնակետը",- ասաց Վիգեն Սարգսյանը: Նա նշեց, որ տարվա ընթացքում Հայաստանում կանցկացվի շուրջ հազար միջոցառում ինչպես Երեւանում, այնպես էլ ՀՀ բոլոր մարզերում, աշխարհասփյուռ հայության յուրաքանչյուր համայքնում:

ՅՈՒՆԵՍԿՕ-ի 36-րդ գլխավոր կոնֆերանսի նախագահ Կատալին Բոջիարդը նշեց, որ իր համար մեծ հաճույք է լինել Հայաստանում նման կարեւոր առիթով: "Հայաստան ժամանելուս առաջին ժամերից զգացել եմ Հայաստանի պատմական շունչը եւ այն, որ այստեղ ապրող մարդիկ հպարտ են իրենց անցյալով, կրոնով: Հայաստանում կա յուրատեսակ վերաբերմունք գրքի նկատմամբ, որն էլ հիմք է հանդիսացել Գրքի համաշխարհային մայրաքաղաքի ընտրության առումով",- ասաց նա` հավելելով, որ ինքը հպարտ է ՅՈՒՆԵՍԿՕ-ի ընտանիքի անունից այստեղ գտնվելու համար: Նա խոստացավ, որ անպայման սովորելու է հայկական ժողովրդական քոչարին:

ՅՈՒՆԵՍԿՕ-ի գլխավոր տնօրենի տեղակալ Էնգիդա Գետաշեւը նշեց, որ այն հանգամանքը, որ հայ ժողովուրդը առաջինը թարգմանել է Աստվածաշունչը, վկայում է գրքի նկատմամբ ունեցած յուրատեսակ վերաբերմունքի մասին: «Տարվա ընթացքում վստահաբար կստեղծվի գրողների, հրատարակիչների, գրավաճառների եւ ընթերցողների միջեւ յուրատեսակ կապ»,- ասաց տնօրենի տեղակալը:

Բունեոս Այրեսի քաղաքապետ Մաուրիցիո Մակրին շոյվել էր հայերի հյուրասիրությունից եւ ժողովրդի հյուրընկալությունից: "Վստահաբար այս տարին կլինի Երեւանում հետաքրքիր եւ իրադարձություններով լի` ինչպիսին մեզ մոտ էր անցած տարի: Չկա ավելի լավ բան, քան կարդացող մարդը, ով ամրապնդում է հույսն այս աշխարհում",- ասաց նա` Երեւանի քաղաքապետին հանձնելով խորհրդանիշ-նվեր` տանգոյի երաժշտական գործիք, որը հաջողություններ կբերի Երեւանին:

Տարոն Մարգարյանն եւս մեկ անգամ շնորհավորեց Երեւանին այս կարեւորագույն տոնի առթիվ եւ շնորհակալություն հայտնեց ՅՈՒՆԵՍԿՕ-ին նման վստահության համար: "Գիրքն ու գրականությունը կարեւոր դեր են ունեցել հայ ժողովրդի համար: Եվ այժմ կա պաշտամունք այդ ամենի նկատմամբ: Պատահական չէ, որ հայերեն թարգմանված առաջին նախադասությունը իմաստությունը ճանաչելու խրատ է պատգամում",- ասաց Տարոն Մարգարյանը:

Միջոցառման ընթացքում ելույթ ունեցան սիրված խմբեր ինչպես Հայաստանից, անպես էլ Արգենտինայից եւ Բանգկոկից: Վերջում Մատենադարանի կոթողային շենքի վրա պատկերվեց 3D շոու-ծրագիր: Միջոցառումն ամփոփվեց շքեղ հրավառությամբ: